Одделот за специјалистичко-консултативна дејност за ендокринологија е посветен на превенција, рана детекција и лекување на широк спектар ендокрини и метаболни нарушувања. Нашиот тим од субспецијалисти и медицински соработници работи на подобрување на квалитетот на животот на пациентите преку доследна имплементација на клинички протоколи и најнови терапевтски методи.
Клучни области на работа
1. Тироидна жлезда и Паратироидни жлезди
Вршиме комплетна дијагностика на сите аспекти на тироидната болест, вклучувајќи хипо и хипертироидизам, воспаленија и туморозни формации.
- Ултразвучна дијагностика: Ехо на тироидна жлезда и откривање на нодули (јазли).
- Интервентна дијагностика: Тенкоиглена биопсија на тироидни нодули водена со ултразвук за прецизна хистопатолошка анализа.
2. Центар за Дебелина и Метаболизам
Дебелината ја третираме како сериозна болест преку мултидисциплинарен пристап:
- Утврдување на типот на дебелина преку антропометриски мерења (ИТМ) и дензитометриска проценка (DXA) на телесната дистрибуција.
- Метаболна и хормонска проценка на ризикот од дијабетес и кардиоваскуларни компликации.
- Едукација за хигиено-диететски режим и медицински третман на дебелината.
3. Репродуктивна Ендокринологија
Обезбедуваме специјализиран третман за хормонски нарушувања кои влијаат на плодноста и квалитетот на живот:
- Женско здравје: Третман на полицистични јајници (PCOS), менопауза, нарушувања на циклусот, инфертилност и гестациски дијабетес (во соработка со гинеколози).
- Машко здравје: Дијагностика и терапија на машка инфертилност (спермограм), хипогонадизам и андропауза.
Лабораторија за ендокрини и метаболни нарушувања
Во склоп на одделот функционира современа лабораторија која е сервисен столб за целата Клиника. Лабораторијата изработува специфични хормонски анализи (TSH, fT4, fT3, антитела и др.) и биохемиски анализи неопходни за прецизна дијагноза на пациентите од амбулантите и од стационарот.
Наука и Едукација
Одделот е наставна база за едукација на студенти и специјализанти, а тимот активно учествува во научно-истражувачка дејност од областа на ендокринологијата, објавувајќи трудови и следејќи ги светските трендови.
